أكيد يارب إنتَ عالم إني ما بَعَرفش آجي هنا إلا وأنا قلبي أبيض وراضية ومتطمنة :)
علشان كده .. شكراً يارب إني هنا
شكراً لأني اتضايقت من نَفسي وزهِقت من حالها ومن اللي وصلت له وجربت كل حلول الدنيا ما نِفِعتش فلجأت لك يارب
لقيت نَفسي ما اعرفش إزاي .. حلوة تاني
بَشهِدك يارب إن قلبي مِش شايل من أي حد من اللي زَعَلوني ..
لأ الحقيقة يارب إني لسة زعلانة وقلبي شايل من ناس مُعَينة
مش قادرة أسامحهم لأني لسة أضعف من مواجهتهم ، يمكن لما أكون قادرة أواجههم أعفو عنهم
ويمكن أواجههم وأوجعهم .
عارفة يارب إنك هتسامحني لأن دا قصاص
ولو إني مهما وجعتهم مش هوجعهم قد ما وجعوني وتَعبوني
شكراً يارب إنك بتحبني رغم إني مقصرة
شكراً إنك ما خذلتنيش أبداً
وشكراً لأنك زرعت فيا الإيمان بإن بكرة هيكون حلو
حتى لو بكرة ما جاش حلو ، كفاية إني اتحملت النهاردة لأني فاكرة إن بكرة حلو
شكراً يارب
|
قريت مقولة عجبتني أوي
"تذكر دائماً . . .لا تُغضب غالياً . . ثم تؤجّل إرضاءه إلى غد !!"
جميييييييييلة اوي بجد المقولة دي
خليتني افكر .. فعلاً لما بزعل حد عزيز عليا ما بعرفش انام ولا اكل ولا أشرب
لأني بجد زعلانة حتى لو قال لي انا مش زعلان
بس انا قلبي زعلان عشانه
وفكرت .. طب لما بنغضب ربنا ؟؟
ليه بنبات اكتر من ليلة وسنة وسنييييين واحنا عاملين حاجات بتغضب ربنا
وربنا بيحبنا أووووووووووي .. أكتر مما يمكن حد يتخيل
وأفضاله ونعمه علينا كتيييييييييييرة اوي أكتر من إننا نعدها
ليه بقى بنأجل إرضاؤه أكتر من ليلة ؟؟
بحاول بجد آخد عهد على نفسي إني لازم أرضي ربنا كل ليلة
وبحاول استغفر ربنا دايماً ومن قلبي
على كل حاجة غلط عملتها .. كبيرة أو صغيرة
فاكراها ولا مش فاكراها
قاصداها او مش قصداها
وياااااااااااارب ما تكونش غضبان عليا ياااااااارب
أنا بحبك أووووووووووووووي يارب
|
( لَئِنْ شَكَرْتُمْ لَأَزِيدَنَّكُمْ )
الحمد لله .. ألف حمد وشكر ليك يااااااارب
|
أخيراً حسيت اني متطمنة ومش خايفة من حاجة
مليون موضوع كانوا مخوفنني لكن لما افتكرت اني استغثت بربنا قويت
واتمليت أمل
يارب .. وعدتنا إنك عند ظن عبادك بيك وأنا ظني بيك الخير يارب
وواثقة انك مش هتخذلني
يارب .. يا حي يا قيوم برحمتك أستغيث .. أصلح لي شأني كله ولا تكلني إلى نفس طرفة عين
|
بسم الله الرحمن الرحيم
( إِنَّ الْحَسَنَاتِ يُذْهِبْنَ السَّيِّئَاتِ ذَلِكَ ذِكْرَى لِلذَّاكِرِين)
صدق الله العظيم
سورة هود آية "114 "
|
"اللهم اني أصبحت أشهدك وأشهد حملة عرشك وملائكتك وجميع خلقك ..
أنك أنت الله لا إله إلا أنت وحدك لا شريك لك وأن محمداً عبدك ورسولك "
جميييييلة أوي وبحب أقولها .. يارب بحبك وفخورة إني بعبدك
هتبقى جزيرة مسك بإذن الله لأن هيكون فيها كتير من كلام ربنا
وهيكون فيها كلام عن ربنا
مدونة روحانية - اسلامية ، مش هعمل داعية ولا واعظة .. لأني اقل من اني اكون كده بكتيييييير
لكن .. حبيت يكون في حاجة تنفعني لما أموت
حبيت إني زي ما بعلن لكل الناس عن حبي لحاجات كتير أعلن بعلو صوتي عن حبي لربنا
ويمكن ألفت نظر حد لحاجة حلوة وآخد ثواب
يمكن أفكر حد برحمة ربنا ويتولد فيه الأمل من جديد :)
|
